خواطر انسان

موضوع: خواطر انسان الأربعاء يناير 13, 2010 3:51 am

لوصبرت أكثر تعبت أكثر وأكثر ........... ماورى رجوا غلاك إلا السراب

مستحيل أسلوبك بيوم يتغير ............ لاضما شفتك ولا شفتك سحاب

غصن حبك لاهشيم ولاهو اخضر ........... فيك شوق وفيك رغبه للغياب

أن طلبتك وصل خطواتك تعذر ........... وان عطيتك صد كثرت العتاب

صار همي كل يوم منك يكبر ......... والأمل لامن بنيته فيك خاب

خلنا نرتاح من اقدر وما اقدر ........... وحيرة تملى شعوري بالعذاب

قلبي اللي لو بنسيانك تأخر .......... القى لاسلوبك الغامض جواب

أنس عرفي مرة أبعد لاتذكر ............ خاطري بالحيل من رجواك طاب

من سنه

من سنه وأكثر عيوني بالعيون ......... تلتقي وتشوف نظرات اهتمام

من سنه عيا الخجل فينا يهون ........... ماتبادلنا ولا حتى السلام

مشكلتنا دايم الشوفه تكون ............. لحظة ماهيب تسمح بالكلام

كل ماناظرت بعيون الفتون .............. زادني في نظرته شوق وهيام

امتاه الصبر يالقلب الحنون ............. السنه درات وعيني ماتنام

طالت الرجوى ومليت الظنون ............ وش بعد صبري على رجواه عام

نار المحبه

انطفت نار المحبه بيننا ................ وأحسب أنه مابقى غير الرماد

يوم هبت ذكريات سنين ............... والتقينا صار للجمر اتقاد

من تلاقت بالسلام ايديننا ................. احترق من بيننا ستر البعاد

صار جرح الشوق يسأل ويننا ................. واعتلى وجه الجفا لون السواد

اشرقت شمس الحنان بليلنا ............... وعادت ايام المحبه والوداد

نسيانك أرحم

نسيانك أرحم من رجاوي سرابك ............. يامن قضى عمري وأنا في رجاويك

حسيبك الله كم شكيت من عذابك ............ نفسي وجرح القلب ماهوب خافيك

يمطر لغيري من حنانك سحابك ............ ويموت قلبي ضاميٍ بين اياديك

ياللي بحبك مارحمني غيابك .......... أعطيك قلبي وانت تبعد خطاويك

رجيت حبك بس طال الرجا بك .......... لين انقطع بالياس كل الرجا فيك

ودي أشرح لك

ودي اشرح لك احاسيسي وخايف ............ والحيا يمنع لساني لايقول

تستحي منك المعاني والشفايف ............. كل ماحاولت اعبر لك واقول

الحروف بخاطري كله ولايف .............. بس إلى شفتك من الخاطر تزول

كل مابانت لي البيض الرهايف ............... في شفاتك صار بي صمتي يطول

لامتى بيني وبينك هالكلايف .................. ليتنا ياصاحبي نلقى حلول

ياسيد احبابي

ياسيد احبابي على غيرك اغليت ......... قلبي وعن غيرك تعذر حنيني

ويش انت بي ياسيد الكل سويت ........... أعميت عن كل المخاليق عيني

لعيونك بكل المحبين ضحيت ............ واهديت لك قلبي وباقي سنيني

مدري لو انك يوم عني تخليت ............ وشلون ابنسى الود بينك وبيني

بالحيل في حبك بقلبي تماديت ........... وابعدتني عن حب ناسٍ تبيني

زرعت نبت الشوق بالقلب واسقيت ............. من دمي غصون الغلا في يديني

ياغالي الود

ياغالي الود قلبي فيك شديته ............ ولعتني فيك يالغالي وحبيتك

ماقبلك أحدٍ من أول شوفه اغليته .............. وشلون مدري هواك القلب واغليتك

وماقبلك احدٍ تولعت وتمنيته ........... أكثر من أني تولعت وتمنيتك

ملكت قلبي لك لحالك ونسيته ................ ماكن بالناس غيرك يوم لاقيتك

محبتك غير يا أغلى انسان حبيت ................ ما اذكر ترجيت كثر اني ترجيتك

الله يقود النصيب اللي ترجيته ................ تعطيني اشواق قلبك مثل ما اعطيتك

ياقصيده

ياقصيده بين الاوراق القديمه ............. ياحبيب صار حبك ذكريات

مابحبك لو تذكرته غنيمه ............ أسأل الوقت الذي بالحب فات

كان حبك في سما دنياي غيمه .............. حاجبه عن عيني افراح الحيات

أرتجيك الحب وتزيد الظليمه ............... ماحصل حتى ولامنك ألتفات

بايعٍ لك فرحتي من غير قيمه ............. السعاده لك وانا هم وشمات

ذابت الرغبه بقلبي والعزيمه .............. لونويت الحب لي ماقلت هات

يبقى الغلا

يبقى الغلا لوفرقتنا المشاريه .......... والشرهة اللي بالخواطر تروحي

كلٍ يعاتب بعض الاحيان غاليه ........... والحب يبقى فوق كل الجروحي

الحب لوشانت علينا لياليه ......... نصبر وفى سر الغلا مانبوحي

طبع الوفا بقلوبنا مانخليه ........... يسري بروحه مثل ماهو بروحي

حبي على باله ولوكنت جافيه ........... وهو على بالي وحبه طموحي

قلبي ولو صديت وابعدت بيديه ........... وبنظرتي شوق اللقا له وضوحي

يقول وش زودي

يقول وش زودي علي الناس عندك ........ وأقول كلك ياهوى خاطري زود

يقول وش بي للمحبه يشدك ......... وأقول مدري أنشد عيونك السود

كل الحلا بالناس ماهوب قدك ......... ياللي مع اخلاقك بك الحسن موجود

كل الزهر ماشاقني مثل خدك ......... ماشاقني بغصونها نامي العود

نفسي مشت بركابها لين حدك ......... ماعاقها زينٍ مع الناس موجود

أغليك يالغالي ورجواي ودك ........... لاتجرح اللي لك من القلب مشدود

لاتقطع اسباب الرجا

لاتقطع اسباب الرجا فيك مرة .......... خل الرجا لو ماصدق فيك يبقى

ترى السراب اللي خداع ومغره .......... ينعش رجا الضامي وهو ويش يلقى

حبك عسى ربي يكافيني شره ............ عجزت عنه بكل شئ اتوقى

أجي لدربك كل يومِ وأمره .......... مشتاق أدور شوفتك واتهقى

ضامي حنان وشوفتك لي مبره .......... ومن الجروح القلب ياما تلقى

ماأحدِ حداني للشقى والمضرة .......... إلا أنت ياللي وجنتي منك زرقا

اشره وعاتبني

اشره وعاتبني عتاب المواليف ......... ماشوف للتجريح يازين داعي

من قبل تجرحك بهوايا المحاسيف ............ اسمع وقدر ياحبيبي دفاعي

يمكن تقول المخطيات الصواديف ............. للجرح مثلك لا تزيد اندفاعي

جرح الغلا في خاطري منك ماشيف ............ ماشفت لوعة خافقي واللتياعي

كلي على صادق هوانا المخاويف ............. لا ينتهي من بيننا لضياعي

اكتم معاناتي وأجيلك على الكيف ............. واخاف من صدك يزيد التساعي

ياما التقينا بالموده ملاهيف ............ عمر العتب ماصار حكمٍ قطاعي

وقتي معك ماغير شتاه والصيف ............ حبك بقلبي لو طويته شراعي

غبت

غبت وبدالك جابه الله على الذوق ......... قلب لقيته فيه نسيان مافات

قلب سرقني من رجاويك برفوق .......... وانهى بقلبي من هواك المعناة

بادلته الإحساس بالود والشوق .......... وداويت فيه اجروحي اللي خفيات

وارتاح قلب كان يرجيك مشفوق ......... رهنته لحبك ولاسج لحظات

ضيعت قلب كان بيديك موثوق .......... وأهديته لغيرك بليا حسافات

صبح الغلا بين بعيني له أشروق .......... وانهيت من ليل الرجا فيك الآهات

مابي لك أعذار ومابي لك حقوق ............. عن وقتي اللي ضاع شوق ومدارات

يقول وشلونك

يقول وشلونك يبي يجرحن زود ........ كلمة عطوف وجرح قلبي وراها

يقولها والقصد بعيونه السود .......... الكلمة اللي قالها ماعناها

بسلوب طيب القلب والعطف والجود ......... يجرح ويدرك غايةٍ ماحكاها

والمشكل أني له من القلب مشدودت .......... غار روحي من غلاه ونساها

يدري بحبي له ولامنه مردود ........... إلا ان نفسي للمذله حداها

يذلني لاقلت ياناعم العود ............ وإلى ابتعد زود على الروح داها

الصبر قالوا لويطول له حدود ............. وانا لعينه صبر قلبي عداها

آخر آهاتي

يا آخر الآهات هز الرجا فيك ............ غيابك االلي صرت انا منه محتار

غايب وانا أشوفك بعيني واراعيك ............. من غير ماتدري وأدور لك اعذار

اشتاق لمصافحك وابعد واخليك ........... في راحتك مادمت للبعد مختار

مادام غيري في حياتك مسليك ........... ياقرب يوم خاطري عنك يندار

خذ راحتك دور على من يهنيك .............. أيامنا كله صواديف واقدار

حتى العتب ماني معاتب لياليك ............ عاتبتها من قبلك بغير وش صار؟

عندي قناعه أن شخص يجافيك ............... مامن رجاه الا 00 يولع بك النار

أضحك وصدق ضحكتك لين ينسيك ............. وقتك غلاه وبادله صد وانكار

بيني وبينك

بيني وبينك مابقي غير مافات ............ ياللي لغير الجرح مايوم حبيت

سامحت مرات وتغاضيت مرات ............. للعذر ويش من المعاذير خليت

ماكان حلمي ضعف لو طول اسكات ........... نفسي على كثر الخطا كل ما أخطيت

كررت غلطاتك وكثرت زلات .............. نفسك وانا غريتك بكثر ما أغضيت

مافاد بك صبري وكثر المدارات .......... ضاقت سعة حلمي وبالحيل مليت

اليوم أنا مقفي ولابه مراوات .............. ولعزتي معذور لوفيك ضحيت

حاولت اعلمك الوفاطول الاوقات ........... وقبلك تعملت الجفا منك وأقفيت

من سألته عنك

من سألته عنك في وجهي تبسم ......قال هي تسأل بعد نفس السؤال

ابتسمت وصرت في صمت أتعشم........واتذكر طيفك اللي بالخيال

اعتصر قلبي من الشوق وتألم..........منوتي تكرار شوفك والوصال

ما اقدر اشكي شوق قلبي واتكلم...........صابرٍ ومطولٍ للهم بال

ياعذابي كان أنا فيك أتوهم ..........والغلى ماله على بالك مجال

عندك زهور العطر صارت كذوبه

عذبه ياكل الذوق بالحيل عذبه ............ ماظن بين الناس مثلك عذوبه

البارحه حسن القمر صار كذبه ........... وعندك زهور العطر صارت كذوبه

حتى الفراش احتار من وين دربه ........... بينك وبين الورد ضيع دروبه

واللي بسحر الزين حسنه يشبه ........... لوناظروك الناس ماشبهو به

وصفك على كل المخاليق صعبه .............. وان ابتسمتي زاد وصفك صعوبه

رقه وحنيه وعطف ومحبه ............. وعند الجميع الله عليك محبوبه

أعمت الغيره عيونك للأسف

خاب ظني فيك والوضع واختلف ............ بعد ماظنيتك انسانه ملاك

أعمت الغيره عيونك للأسف ............. واندفعتي مع ظنونك من قساك

ماكفاك اللي بربه لك حلف ............... ماخدعك وخان لحظه في غلاك

وان قلبه بالمحبه ماعرف ................ غير حبك ياشقا النفس وهواك

قلبي المجروح من ظلمك نزف .................. كل ذرة حب ساقته لرضاك

ابعدي وابعد كفايه ماوصف .............. قبلك اخلاص وشوقي في رجاك

بيننا أيام وتشوفين الصدف........... كل ماجت بي تذكرك بخطاك

اتصالك

هز اتصالك فيني الشوق وانهار ............... قلبي وزادت حيرتي والتياعي

بين الفرح والخوف والشوق والنار ............. ياغاليه زاد العنا والصراعي

تلعب بي امواج الهواجيس واحتار ............. مابين شوقي لك وبين الضياعي

موجة حنين تزيدني حب واصرار ............. وموجات عن شاطيك تبعد شراعي

ياحبي الخافي وياكل الاسرار ............ تحطمت نفسي ولامن يراعي

إلى ضحك الليالي بالانوار ................ جتنا عواكيس الزمن بندفاعي

مدري وش اللي بس تخفيه الاقدار .......... هو لم شمل أوهو فراق وضياعي

بين الرجا والياس قاسيت الأمرار............ أكثر من اللي كان في مستطاعي

ارحل بفكرك

ارحل بفكرك لو دقايق تذكر ........... كل الوجيه اللي تحبك وتغليك

تلقاني اكثر شخص وجهه تكرر ............ ماخان في حبك ولامل طاريك

اغليك فوق اللي تظن وتصور ............. لايبعدك بالحيل عني تغليك

اخاف ياسي من لقاك يتطور .......... واتعب ورى طرد السراب برجاويك

يمل قلبي صدتك ويتغير ............. وتفقد غلاك بخاطري والرجا فيك

دامك بقلبي لك شموع تنورل .............. اتطفي احساس الموده بياديك

يطري عليك بوقت مني تعذر ............. واقول ذكرانا عن الود تكفيك

أسرق النظره

أسرق النظره وابادله النظر ............ واحترس من شر حساد العيون

أدري انك بينهم مثل القمر ............... ومن تبسم لك تطارده الظنون

ياحبيبٍ شوفتك خوف وحذر .............. وش يسوي من يحبك في جنون

إن كتمت الشوق في قلبي قهر ................. وان تبين حبك الناس حسدون

أنا مدري

أنا مدري أنا المخطي أوأنت اللي علي أخطيت .... انا صارحتك بحب أبيك تحن أبي تدري

ربيع العمر يالغالي أنا ماجا على بالي .... تضايق من حقيقة خافي احساسي ومن سري

أنا لوكنت اعرف أنك تبي تبعد وتنساني .... تركت السر في قلبي توقد ناره بصدري

أنا بيدي عميت عيوني اللي تسعد بشوفك.... وأنا بيدي ذبحت افراح نفسي بك وانا مدري

كتبت العذر من دمعي لعلك تقبله مني ..... وتنهي هجرك اللي طال يالغالي على عمري

انت الربيع

انت الربيع وروض الازهار والسيل .................... بارضٍ تعدى وسمها ماسقاها

تنظرك عيني وابتهج وإن بدا ................. الليل شفتك قمر يطرد ظلامٍ وطاها

أوقد غضا واسمر معك بالتعاليل ................... والصبح تاخذني عيونك وراها

أيام ماتنسى بذيك المداهيل ..................... تحت النفود وبين غالي غضاها

أيام تروي شف وتجدد الحيل ..................... وتداوي اللي به جروحٍ شكاها

الله يعيده بالليال المقابيل...................... يازين نسيان الجروح وشقاها

-------------------------

أيست من رجواك

أيست من رجواك ياناسي الحب ............... لو بك رجا ماضاع عمري وأنا أرجيك

أربع سنين أرجيك وأشكي لك القلب............... أشكي جروحه منك ربي يجازيك

تشوفني يازين في عابر الدرب .................. وتصد عني كن غيري يناديك

أعطيك قلبي وانت تعلن لي الحرب ............... نفسك كبيرة ماتبي من يداريك

تجرحني بصدك وهجرك بلا ذنب ..................إلا أن قلبي ياهوى النفس يغليك

تلاقيت

تلاقيت انا واللي ترك صورته ذكرى ............. بقلبي وعيني وافترقنا بلا ميعاد

رجيته وعد قال الوعد صعب وانت أدرى.............. ظروف الزمن ماهي على كيفنا تنقاد

انا لو أبي ودي يصير الوعد بكرى................. ولا ودي انه يوم يمضي وحنا ابعاد

رحل ببتسامه والتفت قال مايدرى ................... يجوز اللقا اللي صار صدفه لنا ينعاد

ترك للرجا قلبي جريحٍ ولا تبرى ................... جروحه ولو حاولت نسيانها مافاد

عسى الله يعيد بشوف من شوفته تشرى ................ وينهي فراقٍ منه انا والزمن بجهاد

تونا

تونا وين ياناوي تروح ........... خلنا نفرح بشوفك تونا

شوفتك لي هي دواء كل الجروح ................. لاتسافر فيك قلبي ما اهتنا

من يلوم اللي على خله ينوح ............. توي أدري ويش حبك ويش انا

دمعتي ماهيب من قلبٍ مزوح ............ دمعتي فيها المعاني والعنا

لاذكرت أنك عن الديره نزوح .............. ضاقت الدنيا الوسيعه بالهنا

أنت لي كل المحبه والطموح ............. وانت لي كل السعاده والمني

جاني من الماضي

جاني من الماضي وفايت لياليه ............... ينشد عن جروحٍ دفنها زماني

وقفت محتارٍ عيوني تراعيه .............. أبكي فرح وأبكي ندم من حناني

مديت كفي وارتعش بين أياديه ............ رديت لسنينٍ مضت في ثواني

بالله وش جابك لقلبي وطاريه ............. وش لك بتجديدالعنا اللي طواني

لاتجرح اللي طاب مافات كافيه ............ عطني جديد الحب وأغلى الأماني

عطني حنانٍ ضاع عمري وانا أرجيه .......... اللي مضى من هم حبك كفاني

حبي اللي في خيالي

حبي اللي في خيالي له وصوف .......... مالقيته غير بعيونك أبد

دايمٍ بالناس بالغالي أشوف .......... من كمل زينه ولا شدن أحد

لين جابتك الليالي والظروف ........... كنها توعدك في قلبي وعد

بالغلا كنه على القلب محلوف ............ مايحب الا انت وأعطيك العهد

صابني رمشك وسلمت الكفوف ............ خابرٍ مابي على اللوعه جهد

صابني سحرالنواظر ياهنوف ........... والحنان اللي بنظراتك بعد

حيرتني

حيرتني ياموقدٍ فيني النار ............. مابين نظراتك وبين المعاذير

لاقلت أبي شوفك تعذرت باعذار ................ وإن قلت كيفك قلت يافاهمٍ غير

يتعبني التفكير يازين واحتار ................ ولكثرة الأعذار ماشوف تبرير

مدري بحبك وش تبي مني اختار .................. البعد والا القرب أبي منك تبصير

تزاحمت بي من تصرفك الافكار ................ في نظرتك هجر وموده وتقدير

يازين ريحني بجيه ومسيار..................والا قل ابعد وانتفارق على خير

داوني بالصبر

داوني بالصبر والا بالوصال .............. داوني ياكل حبي والرجا

لاتقطع في يدي كل الحبال ............... يابعد من حبه بقلبي لجا

أنوني بالوصل والا قل تعال ............ وارحم اللي من همومك مانجا

شمس حبك مالها عندي زوال ................ وطيف زولك مايغطيه الدجا

أرتجيك الوصل ياحلو الدلال .................. بالنهار وكل ماليلي سجا

لو لقلبي عن محبتك احتيال .................. ماتعذب في هواك ولارجا

سواد الليل

هو سواد الليل مني فيك غار ................ يوم عجلٍ بيننا وقته يسير

أو مثل شوقي لك اشتاق النهار ............... انجرح من غيبتك وقتٍ قصير

ليه حتى الوقت يالمحبوب صار ................... بك يحاسدني ومني بك يغير

مادرى وش كثر قاسيت انتظار .................... مادرى عن دامي الجرح الخطير

درب وصلك يحسبونه لي عمار .................... مادرو أنه على مثلي عسير

مادرو بالحظ في شوفتك جار ................... وإن قلبي في رجا الصدفه أسير

سيرة الشعر

سيرة الشعر لولا سحر عينك حبيبي .............. ماطرت لي ولاجا بالمشاعر قصيده

قبل أشوفك وانا لامن بعيد أو قريب ................. يبين الأوراق مابه من قصيده جديده

ساليٍ بعد جرحٍ كان فيني عطيب .................. يطاب لكن عيونك ناوياتٍ تعيده

كم شقيت بحياتي ماذكرني نصيب ............... يغير في جرح شوق وفي همومٍ نكيده

أرجي الله حظي بالغلا مايخيبي .............. امسح احزان قلبي من سنينٍ عديده

شمس المحبه

شمس المحبه قربت للزوالي ............. جاك البديل اللي لشوفته تشتاق

نويت هجري يابعد كل غالي ............. وين الزمان اللي مضى وين الاشواق

هانت عليك ايامنا والليالي .............. وانهيت ذاك الحب يازين بفراق

نسيت جرحي ماطرى لك وصالي .............. وانا لهيب الشوق بالقلب وقاد

انت بحياتي كل حبٍ طرالي ................ وانت بظلام الوقت لي شمس واشراق

عد الزمن

عد الزمن عد بغلاك الليالي.......كم جرح مني جاك وبحقك اخطيت

وإذكرني بخير إن طرى لي مجالي .......والا بنفسك يوم بالفكر مريت

مانت أول همومي ولا أظن تالي..........دنياي ياما لوعتني وعانيت

ومانت أول انسانٍ على القلب غالي.....جابك زمان وراح بك مثل ماجيت

علمني الوقت وزمانٍ مضالي............أعز نفسي لومن الهم قاسيت

عطني مثل قلبك

عطني مثل قلبك ولا أقول وينك ........... لاغبت عني ياهوى البال وأبطيت

حبك بقلبي لوتشوفه بعينك ............ عذرتني من غيبتك لوتشكيت

أحن لك واشتاق لك ولحنينك ............ ويضيق بالي كل ماشفتك أقفيت

كم ودي آخذ في يميني يمينك ............. وأعيش في عمر الغلا وين حبيت

ماتبتعد بك عن عيوني سنينك ............... ولا تبعدك سود الليالي إلى جيت

أجرح ظروف الشك بي في يقينك ........... مالي بغيرك عزوةٍ لوتعنيت

ياسلوتي قلب المعنا ظنينك ........... لاتجرحه بالبعد دامك توليت

عنادك

عنادك يالمهاديب الدقاقه ......... أحبه لويجي في غير حينه

أحب اللي نظر عينه سراقه ............ يشوق بالغلا خافي حنينه

إلى جت عيني بعين اشتياقه ............. تبستم ثم سلهم رمش عينه

يعاندني عنادٍ له مذاقه ............ أحبه منه لونفسي حزينه

يعاند قلبي بشوق ورفاقه ............ ومن زود الغلا بيني وبينه

عين الغلا

عين الغلا لوشافتك جفن واهداب .............. ماتشبعك نظرة ولاترتوي شوف

اشتاق لك لحظات لارحت بغياب ............... ويصير شوف العين بالعين مخطوف

يشدني لك بالغلا واجد اسباب ............. وكل سبب أقوى من الثاني ظروف

اشوف غيرك بس ياكل الاحباب .............. مافيهم اللي فيك من حس ووصوف

دامك معي ما احسب لغيرك احساب .............. كلي وفا لك واطرد الشك والخوف

غابت الشمس

غابت الشمس ياويل العيون ............. آه ياطول ليلي والسهر

كل ماغبت عني يافتون ................. كني مفارقٍ كل البشر

أدفن الضيق بالقلب الحنون ................ والتناهيد في عمر القهر

أقضي الليل هاجوس وظنون ................... ضايق البال مجروح النظر

كل ماقلت هونها وتهون ................. عانق الدمع رمشي وانتثر

مايعوضك غيرك لو يكون .............. من يكون وغيابك لي كدر

غلطة عمر

محبتك غلطة عمر في حياتي ............. ابعتذر عنها لعمري والايام

اشقيت نفسي فيك من حسن ذاتي .......... أزرع لك رياض الغلا وأرسم أحلام

حتى بنفسك ماتسوي سواتي .............. كلي وفاء وأنت الوفاء عندك أوهام

خذ حبك المجروح مع ذكرياتي ................... مابي بقايا منك ياغالي العام

لاني غناة لك ولانتب غناتي .............. عشنا الغلا بس الغلا عاد مادام

أقولها ماعض سني شفاتي ............. مابي حسايف يكفي عيوني تنام

قرب يطيب الجرح

قرب يطيب الجرح لولاي مريت ................ على دروبٍ ذكرتني بخلي

وقفت حاير بين شوق وتناهيت ............... قلبي ينوح ودمع عيني يهلي

أبكي حبيب راح أقفى وانا أقفيت .............. يومه على ذا الدرب فيني يهلي

يوم الليالي لي على ماتمنيت ............. يوم العذول اللي يلومن مولي

واليوم والله من هوانا تشكيت ............ غاب الذي لايام عمري يحلي

غاب وتركني غارقٍ بالتناهيت ............ مابعده أحدٍ في حياتي يسلي

كذبة وفاء

ما دفعني للغياب إلا لقاك ............ وماندمت من الفراق الا عليك

صورتك في عيني إنسانه ملاك ................ وصورتي (كذبة وفاء)ماتهتويك

صعب تجمعنا المسافة في غلاك ............. والمشاعر تختلف فيني وفيك

كان غيري ماصدق يوم بهواكا ............... لأصابع ماتساوى في يديك

صار شوفك جرح واتعبني لقاك .................. راحتي بالبعد لو قلبي يبيك

ابعدي وابعد مادام إنه رضاك ................. الفراق أرحم لقلبٍ يرتجيك

كلمة في خاطري

كلمة في خاطري دايم تجول ............... كلمةٍ لوقلتها له ماشقيت

ودك أن الحب مايبلى خجول .................. أنقضى بالصمت عمري ماحكيت

إن تلاقينا وإلى صمتى يطول ............. وإن رحل قلت آه ليتي له شكيت

حايرٍ بالصمت مفقود الحلول .............. حيلتي ترديد كلمة ليت ليت

كلما حاولت اعبر له وأقول ............... ضاع تعبيرالكلام وماقويت

شوق يدفعني وخوفٍ بي يحول ............ لين ضاع الوقت مني مادريت

يازمان الصمت بي شوقٍ يهول ......... وانقضى عمري ولا أدري وش نويت

لاتذكرني

لاتذكرني رحيلك والغياب .............. لا تعجل في دموعٍ مقبلات

لاتعذبني قبل وقت العذاب ............. لك دموع العين مافيها فوات

خلني مرتاح لاتطري غياب ................ لاتخاف اعتاد ضحكات الشفات

حاسب للهم في بالي حساب ............... مانسيت أيامي اللي مقبلات

عارف ان أفراحنا هذي سراب ............. تنتهي بكرى وتبقي ذكريات

ما نسيت أني جريحك لاتهاب ................ سلوتي يانور عيني بالحياة

لاتلتفت

لاتلتفت مثلك على الصد نقوى ............ والجرح ياما غير حبك يداويه

ياما بخلق الله مجاريح رجوى ......... كم خاطرٍ مجروح والوقت مشقيه

بالناس أبلقى عن رجاويك سلوى ............ مافات شي ومنك انا الحب مابيه

جاملتك التجريح من غير شكوى ............ صبرت لين القلب ضاقت محانيه

يازين ماني لك على منت تهوى ............. يومٍ تبي حبي ويوم تخليه

بارق سحابك مالنا فيه رجوى ............ مسكين قلبٍ من لياليك يرجيه

لاتوهم

لاتوهم رجعتي يمك ذليل .............. ينقضي عمرك بوهم الانتظار

كل جرح لعزتي عندي جميل ............ وكل بسمة ذل بين اشفاي نار

لونهاري صار من فرقاك ليل ............. مابكت عيني على شوف النهار

ولو نسيت النوم من هم ثقيل ............. ماشكا جفن السهر لك وين صار

طبعي العزه وراسي مايميل ............. غير لله في مذله وانكسار

كان عندك بي امل لوهو قليل ............. أمسحه مانيب راجع باختصار

لحظة التوديع

لحظة التوديع فيها ويش أقول ............ كل مابالقلب قالته الدموع

أعذرن يازين لوصمتي يطول .......... لاتلومن حسرة الفرقا تلوع

ودي أوادعك والعبره تحول ............. موقفي صعبٍ وفرقاكم تروع

أنتصر حزني وضاعن الحلول ........... وانطفت من لوعتي كل الشموع

في خفا قلبي تعابيرٍ تجول ............... في وداعك وانتهت بين الظلوع

للأسف

للأسف وبكل مراره لك أقول .............. انتهينا واذكر ايامي بخير

مابقى لي غير فرقانا حلول ........... عن هوانا جرحك ابعدني كثير

كم تمنيت المحبه لوتطول ............ و للاسف ماكل مانرجي يصير

وردة الأشواق لاجاها ذبول ........... صعب ترجع مثل ماكانت عبير

لاتزيد اعذار وتعيد وتقول .......... من غلاك احساس قلبي مستخير

فات وقت وراحت ايام القبول .......... الفراق ارحم ولا به حل غير

للسالفه باقي

للسالفه باقي وللوقت كلمه ............ تقولها لك عني احوال الايام

اللي ذرف لك تالي الدمع دمه .............. بكرى تشوفه حب ويشوفك اوهام

لو للغلا ياجارح القلب ذمه ............... ماكنت انا اسهر وانت في ليلك تنام

ياللي تعشق الجرح ماذقت همه ............ ولا شكيت الحزن ليله من العام

غير الوفا ماشفت فينا مذمه ............. واكبر عيوب الورد تعطير الانسام

ماعاد قلبي فيك شي يهمه .......... بيني وبينك دارت ايام وايام

مات الغلا في قلبي اللي يضمه ............. واليوم ذق من صدنا موت الاحلام

لو تبادلني سلامي

لوتبادلني سلامي بالسلام ............ واضحٍ فيك الزعل ماهو قليل

باختصارك ياحبيبي للكلام ......... . والتفات عيونك بسرعه دليل

واضح أنه ماكفى عذري ملام ........... تلتفت يمي وفي لحظه تميل

كم علي أخطيت وتمر بسلام ........... ارتضي عذرك وقلبي مايشيل

عنك اسامح والتفت لك باهتمام ............ وابتسم لاجيت ماكني عليل

انسى جرحي من غلاك ومن هيام ............ نفسي اللي فيك ماترضى بديل

لاتذللني سبب زله حرام ............. ماهقيتك يوم ترضى اني ذليل

لك شرحت الوضع في كل احترام ............ وش تبي أكثر من العذر بدليل

كان قلبك حب غيري ماتلام .............. مالي الا انساك في صبرٍ جميل

لو ماتشوف الود

لوماتشوف الود عيني بعينك ............. صدقت هجرانك وكذبت عيني

ولو ماتحس أيدي برعشة يدينك .............. لاجيت اسلم قلت مانتب تبيني

جمعت مع صدك بعينك حنينك .............. حيرتني واحترت لك في حنيني

بالله قلي ويش بيني وبينك .............. يغريك صد ويبعدك ماتجيني

ماشفت شخصٍ مثل طيبك ولينك ............... وماشفت انا أقسى منك أبد في سنيني

ما اقول لك مخطي

ما اقول لك مخطي ولا اقول غلطان ........... أقول انا فيك الظروف اخذلتني

مانت اول اجروحي ولا أول انسان .......... غالي ومن شوفته ظروف احرمتني

في قلبي جروح وتباريح واحزان ........... وعلى الصبر دنيا الشقا علمتني

الله معك وانس الذي بيننا كان ........... غلطه عليك اشواق نفسي رمتني

ماغيّرك غيري

ماغيّرك غيري حقيقه وأنا أخطيت ............ غريتك بكثر الغلا واحترامي

أسرفت لك بالود لين أني احييت ........... فيك الغرور بلهفتي وبهيامي

ماتدري أنك بالجفا لو تماديت ............ تفقد غلاك وبك يقل اهتمامي

أعتاد من صدك على الصد إلى أبطيت ............ ويصير مالك عندي الا السلامي

طرد السراب ورجوة الحي للميت ............. ماتخدع إلا معه قلب عامي

ماكنت في بالي

ماكنت في بالي ولاكنت هاويك ............ وماكنت يالغالي تثير اهتمامي

وماكان يعنيني إلا جيب طاريك .............. اسم وسمعته مثل كل الاسامي

لين اجمعتني في عيونك لياليك ........... وحسيت لي عندك مكان ومقامي

شديتني في طيبةٍ شفتها فيك ............ وكسبت تقديري وكل احترامي

مالي ومال الوقت

مالي ومال الوقت مادمت وأياك ............ أنت الزمن لي وانت كل المواعيد

خذ من زماني كل وقتي ويفداك .............. مافي حياتي لك من الوقت تحديد

أنت الذي في بسمة من شفاياك ............. أنسى همومي والسعاده لي تزيد

وأنت الذي يااعز غالي بيمناك ............. أخذتني من بحر الأحزان للعيد

أقدر على نسيان قلبي ولا أنساك.......
غيرك أنا يافرحة العمر ما أريد

منقوله

موضوع: رد: خواطر انسان الأحد يناير 31, 2010 7:19 am

روعه
يسلمووو

كلماات رائعهـ بروعتك,,
يسلموو..